උතුර – දකුණ මාධ්‍ය බැඳීම ශක්තිමත් කරමින් යාපනය ලේක්හවුස් කාර්යාලය ධීවර, ජලජ සහ සාගර සම්පත් ඇමැති රාමලිංගම් චන්ද්‍රසේකර් සහ බුද්ධශාසන, ආගමික හා සංස්කෘතික කටයුතු ඇමැති, ආචාර්ය හිනිඳුම සුනිල් සෙනෙවි මහත්වරුන්ගේ ප්‍රධානත්වයෙන් (18) විවෘත කෙරිණි.
මේ අවස්ථාවට යාපනය දිස්ත්‍රික් පාර්ලිමේන්තු මන්ත්‍රීවරුන් වන කේ. ඉලංකුමාරන්, එස්. ශ්‍රී බවානන්දරාජා, හිටපු පාර්ලිමේන්තු මන්ත්‍රී ආන්නද සංගරී, ශ්‍රී ලංකා කලා මණ්ඩලයේ සභාපති සාහිත්‍යවේදී කීර්ති වැලිසරගේ, රාජ්‍ය සාහිත්‍ය අනුමණ්ඩලයේ සභාපති සම්මානනීය ලේඛක කමල් පෙරේරා සහ ලේක්හවුස් කර්තෘ මණ්ඩල අධ්‍යක්ෂ, ජ්‍යෙෂ්ඨ මාධ්‍යවේදී සිසිර යාපා, තිනකරන් පුවත්පතේ ප්‍රධාන කර්තෘ සෙන්දිල් වේලවර් මහත්වරුන් ඇතුළු පිරිසක් සහභාගි වී සිටියහ.
අංක 06, සිරම්පියාඩි පටුමඟ, පිටත ස්ටැන්ලි පාර, යාපනය ලිපිනයේ එම ශාඛා කාර්යාලය උදෑසන 7.45ට විවෘතව තැබේ.
සීමාසහිත ලංකාවේ එක්සත් ප්‍රවෘත්ති පත්‍ර සමාගම මෙරට පැරණිතම සහ විශාලතම පුවත්පත් ප්‍රකාශන ආයතනය ලෙසින් සැලකෙන අතර, දැනට ලේක්හවුස් ශාඛා කාර්යාල තුනක් නුවර, මාතර සහ අනුරාධපුර දිස්ත්‍රික්කවල පිහිටා ඇත.
ලේක්හවුස්හි යාපනය ශාඛා කාර්යාලයෙන් උතුරු දකුණු බැඳීම් ශක්තිමත් කිරීමට දායකත්වයක් ලැබෙනු ඇතැයි අපේක්ෂා කරයි.
